Члены народнага літаратурна-паэтычнага клуба “Натхненне” прынялі ўдзел у літаратурна-музычнай гасцёўні. У чытальнай зале бібліятэкі горада Старадуб Бранскай вобласці сустрэліся паэты з Беларусі і Расіі.
– Прыемна, што гэтыя сустрэчы набываюць трывалы традыцыйны характар, – адзначыла Людміла Яськова. – У гэты раз сустрэча была прысвечана дню памяці князя Уладзіміра і Дню хрышчэння Русі.
Пра значэнне гэтых святаў расказаў запрошаны на сустрэчу прадстаўнік праваслаўнай царквы. А яго прапанову правесці царкоўна-паэтычнае мерапрыемства паэты ўспрынялі з энтузіязмам.
Старадубцы цёпла сустрэлі добрушскую паэтэсу Людмілу Яськову, музыканта, спевака-барда Аляксея Скачкова. Іх творы калегі па пяру, як заўсёды, успрынялі радушна. Творчую эстафету прачытаць вершы дабрушане перадалі літаратурна-эстэтычнаму аб’яднанню “Глаголъ”, паэтам з Навазыбкава.