Літаратурны фэст “Гомельская літаратурная восень”, які штогод арганізоўваецца Гомельскім абласным аддзяленнем Саюза пісьменнікаў Беларусі, 2-3 лістапада збірае творцаў і аматараў мастацкага слова ў горадзе над Сожам. Якія падзеі чакаюць гамяльчан і гасцей Гомеля сёлета, мы пацікавіліся ў кіраўніка і членаў Савета абласнога аддзялення Саюза пісьменнікаў Беларусі.
Хто «ўзлез» на Парнас?
Літаратурны фэст сапраўды будзе цікавым, насычаным на падзеі. І, зразумела, запамінальным для тых, хто прыняў удзел у абласных літаратурных конкурсах. Мы папрасілі расказаць члена Савета аддзялення Міхася Болсуна, наколькі часта ладзяцца такія літаратурныя конкурсы, хто забяспечвае падрыхтоўчы і выніковы працэс і каму пашчасціла сёлета «ўзлесці» на Парнас?
– Сапраўды, шмат ініцыятыў і праектаў ажыццявіла за апошнія некалькі гадоў Гомельскае абласное аддзяленне гра- мадскага аб'яднання «Саюз пісьменнікаў Беларусі». Нямала з іх было скіравана на працу з творчай моладдзю, пачынаючымі аўтарамі, на прапаганду чытання. У Год кнігі абласным аддзяленнем з 1 сакавіка па 1 жніўня праводзілася два творчыя конкурсы – пяты абласны конкурс імя Кірылы Тураўскага на лепшае апавяданне і другі абласны паэтычны конкурс, прысвечаны 130-годдзю з дня нараджэння Янкі Купалы і Якуба Коласа.
У аргкамітэт конкурсу імя Кірылы Тураўскага пададзена звыш двух дзесяткаў апавяданняў, у ім удзельнічалі людзі розных прафесій, заняткаў, з розных месцаў і населеных пунктаў Гомельшчыны. Зразумела, і прадстаўленыя імі творы розныя па якасным ўзроўні, мастацкім асэнсаванні, глыбіні раскрыцця вобразаў галоўных герояў, падзей. Разам з тым, парадавала цяга да творчасці, імкненне да асэнсавання сённяшняй рэчаіснасці, павага да роднай мовы і культуры. Журы вызначыла лепшыя празаічныя творы. Першае месца прысуджана культработніку, дырэктару Руднямарымонаўскага СДК Тамары Курленка (апавяданне «Туман над поплавам»). А другое месца падзялілі паміж сабой два мужчыны. Журы высока ацаніла апавяданне супрацоўніка Гомельскай абласной бібліятэкі імя У. I. Леніна Юрыя Рачынскага (апавяданне «Дзень даўжынёю ў жыццё») і жыхара пасёлка Каранёўка Гомельскага раёна, пенсіянера Яўгена Грыгарэнкі (апавяданне «Цяжкая дарога»). А вось трэцяе месца дасталося жанчынам. Сакавіты народны гумар, арыгінальнасць задумы прысутнічаюць у апавяданні «Срэбны Двор» Наталлі Трызназ Гомеля і апавяданні «Індывідуальнасць» Галіны Рагавой ( жыве ў пасёлку Каранёўка Гомельскага раёна). У адпаведнасці з рашэннем журы яшчэ тры пачынаючыя аўтары будуць адзначаны заахвочвальнымі ўзнагародамі. Гэта вучаніца 6 «А» класа гімназіі г. Нароўлі ГаннаКавальчук (апавяданне «Ён шмат бачыў»), гамяльчанін Раман Разанаў (апавяданне «Кашмар маладога літаратара»), студэнт універсітэта імя Ф. Скарыны Сяргей Прывалаў (апавяданне «Усё бывае ўпершыню»).
Другі абласны паэтычны конкурс, прысвечаны 130-годдзю з дня нараджэння класікаў беларускай літаратуры Янкі Купалы і Якуба Коласа, як і пяць гадоў таму, прайшоў пры даволі вялікай актыўнасці аўтараў. Журы давялося пазнаёміцца, прааналізаваць і даць заслужаную ацэнку амаль чатыром дзясяткам паэтычных спроб, дасланым на конкурс. Тэматычная накіраванасць вершаў – прысвячэнні Янку Купалу і Якубу Коласу, Беларусі, роднай мове, непаўторнай прыгажосці беларускай прыроды. Разам з тым, трэба адзначыць, што ў некаторых аўтараў не хапае філалагічнай культуры, а таму зарыфмаваныя тэксты складана назваць вершамі. Журы, зрабіўшы глыбокі аналіз прапанаваных аўтарамі твораў, вырашыла лаўрэата першай ступені не вызначаць. Найбольшай выразнасцю, вобразнасцю вызначаюцца вершы Зінаіды Фісюк з вёскі Кароткавічы Жлобінскага раёна (верш «Родная мова») і Алены Мішчук з Калінкавічаў (верш «Зоркі»). Ім прысуджана другое месца і званне лаўрэатаў конкурсу. Трэцяе месца прысуджана вучаніцы СШ №53 г. Гомеля Ганне Плахатнюк (верш «Мой бэзавы горад»).